დმანისის მუნიციპალიტეტში, მოწყვლადი ოჯახებისთვის სასურსათო კალათების დარიგება მიმდინარეობს

• 2020-12-26 18:18:34

ქვეყანაში არსებული ვითარების გათვალისწინებით, დმანისის მუნიციპალიტეტში, მოწყვლადი ოჯახებისთვის სასურსათო კალათების დარიგება მიმდინარეობს.

დმანისის მუნიციპალიტეტის მერმა, გიორგი ტატუაშვილმა, მერიისა და საკრებულოს წარმომადგენლებთან ერთად, მუნიციპალიტეტში მცხოვრებ 52 შეჭირვებულ ოჯახს, 10 655 ლარის ღირებულების ტკბილეულისა და სურსათის კალათა გადასცა. თითოეული კალათის ღირებულება 205 ლარს შედაგენს.

სასურსათო კალათები სხვადასხვა სოციალურ ჯგუფებს გადაეცემათ მათ შორის, ხანდაზმულებს, შეზღუდული შესაძლებლობის მქონე პირებს, სოციალურად დაუცველებს, მარტოხელა პენსიონერებსა და მრავალშვილიანებს.

" ამ ეტაპისთვის, სოციალური აქციის ფარგლებში სასურსათო კალათა, მუნიციპალიტეტში მცხოვრებ 52 ოჯახს გადავეცით. მსგავსი პროგრამის განხორციელება ძალზედ მნიშვნელოვანია პანდემიის პირობებში.ჩვენ ვცდილობთ მაქსიმალურად გავაფართოვოთ ამ მხარდაჭერის არეალი ისე, რომ მოახლოებულ ახალ წელს არცერთი ოჯახი არ დარჩეს ზრუნვის გარეშე"- განაცხადა დმანისის მუნიციპალიტეტის მერმა, გიორგი ტატუაშვილმა.

აღსანიშნავია, რომ სოციალური აქცია მუნიციპალიტეტში ეტაპობრივად გაგრძელდება.