ახალციხის მუნიციპალიტეტის საბავშვო ბაღები რეგულაციების სრული დაცვით გაიხსნება

• 2020-09-29 14:26:35

ახალციხის მუნიციპალიტეტის საბავშვო ბაგა-ბაღები სასწავლო-სააღმზრდელო პროცესის განახლებისთვის აქტიურად ემზადებიან.

სააღმზრდელო ჯგუფების მოწესრიგებასთან ერთად, სახელმწიფოს მიერ დადგენილი სავალდებულო რეგულაციების შესასრულებლად აუცილებელი ინვენტარითა და საშუალებებით უზრუნველყოფა მიმდინარეობს.

პროცესში ჩართულია სამცხე-ჯავახეთის განვითარების ცენტრი, რომელიც პანდემიის პერიოდში აქტიურად თანამშრომლობს ახალციხის მუნიციპალიტეტის მერიასთან სხვადასხვა მიმართულებით, მათ შორის ერთ-ერთი პრიორიტეტი სკოლამდელი აღზრდის დაწესებულებების მხარდაჭერაა. სამცხე-ჯავახეთის განვითარების ცენტრმა ახალციხის მუნიციპალიტეტის 26-ვე საბავშვო ბაღისათვის დეზობარიერები, სადეზინფექციო სითხის დისპენსერები და ნარჩენების კონტეინერები შეიძინა.

აღნიშნული ინვენტარისა და სადეზინფექციო საშუალებების გადაცემის პროცესს ახალციხის მუნიციპალიტეტის მერის პირველი მოადგილე გურამ მელიქიძე, სკოლამდელი აღზრდის დაწესებულების დირექტორი მარინა მერაბიშვილი და სამცხე-ჯავახეთის განვითარების ცენტრის წარმომადგენელი ელენა ბეგიაშვილი ადგილზე გაეცნენ.