ცაგერის მუნიციპალიტეტში სოფელ ლაილაშის საჯარო სკოლის მშენებლობა დასრულდა

• 2021-02-25 18:16:32

ცაგერის მუნიციპალიტეტში სოფელ ლაილაშის საჯარო სკოლის მშენებლობა დასრულდა.

პროექტი ითვალისწინებდა 90 ბავშვზე გათვლილი, თანამედროვე სტანდარტების შესაბამისი, სკოლის მშენებლობას.

სამუშაოები 2019 წლის სექტემბერში დაიწყო და მიმდინარე წლის თებერვალში დასრულდა.

პროექტი საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა საქართველოს მთავრობის ფინანსური მხარდაჭერით განახორციელა და მისმა ღირებულებამ 1.9 მილიონი ლარი შეადგინა.

საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი, საგანმანათლებლო ინფრასტრუქტურის მშენებლობისა და რეაბილიტაციის პროგრამის ფარგლებში, აშენებს 66 სკოლას, რეაბილიტაციისა და ენერგო-ეფექტური კომპონენტის გაძლიერების სამუშაოებს კი 100 სკოლაში ახორციელებს.

2020 წელს ინფრასტრუქტურის სამინისტრომ უკვე დაასრულა 20 ახალი სკოლის მშენებლობა 1530 მოსწავლისთვის.

2021 წელს კი დამატებით დასრულდება კიდევ 41 სკოლის მშენებლობა 7 020 ბავშვისთვის.

ასევე, 2021-2022 წლებში ეტაპობრივად დასრულდება 100-ზე მეტი სკოლის რეკონსტრუქცია/რეაბილიტაციის სამუშაოები, რომელთა შედეგად 16 000 მოსწავლე სრულად განახლებულ სკოლაში ისწავლის.

საგანმანათლებლო პროგრამას საქართველოს მთავრობა და დონორი ორგანიზაციები (CEB და NEFCO) აფინანსებენ. პროგრამის საერთო ღირებულება 300 მილიონ ლარზე მეტია.