ზუგდიდის მუნიციპალიტეტის სოფელ ორსანტიაში 11 კოვიდ დადებითი შემთხვევა გამოვლინდა, გაიტესტა 51 ადამიანი

• 2021-04-03 14:10:22

ზუგდიდის მუნიციპალიტეტის სოფელ ორსანტიაში 11 კოვიდ დადებითი შემთხვევა გამოვლინდა, გაიტესტა 51 ადამიანი. 31 მარტიდან დღემდე სოფელში სულ გამოვლენილია 17 ახალი შემთხვევა. ორსანტიაში კორონავირუსის ახალი კერა სავარაუდოდ ფოთში მდებარე ,,აჭარა ტექსტილს“ უკავშირდება, სწორედ აქ მომუშავე 4 ქალბატონს დაუდგინდა თავდაპირველად ვირუსი.

ორსანტიაში სამეგრელო-ზემო სვანეთის სახელმწიფო რწმუნებული მალხაზ თორია და ზუგდიდის მერი გიორგი შენგელია იმყოფებოდნენ.

როგორც ხელისუფლების წარმომადგენლებმა აღნიშნეს, პრევენციისთვის ორსანტიაში დაიწყება ტესტირებები და თერმოსკრინინგი, რათა დროულად იქნას გამოვლენილი ინფიცირების შემთხვევები.

გამოკვლეულია კოვიდ დადებითი მოქალაქეების კონტაქტები, მათი ნაწილი დღეს გაიტესტა და პროცესი გრძელდება.

სოფელში პოლიციასთან ერთად მიმდინარეობს მოქალაქეების თერმოსკრინინგი, ჯანდაცვის მუნიციპალური დანაყოფის მიერ ხორციელდება ადგილობრივების მასიური ტესტირება. სოფელში მომდევნო 12 დღის განმავლობაში მკაცრი კონტროლი განხორციელდება. ხვალიდან ორსანტიაში ტესტირების პროცესში სამი ბრიგადა ჩაერთვება.

იხილეთ ვიდეო