სენაკის მუნიციპალიტეტის 2021 წლის ბიუჯეტით, ჯანმრთელობისა და სოციალური დაცვის პროგრამებზე 1 181 000 ლარი გამოიყო

• 2021-01-28 15:07:44

ჯანდაცვამ და მოსახლეობისადმი სოციალურმა მხარდაჭერამ, კორონავირუსის პანდემიით გამოწვეული ახალი რეალობის შექმნასთან დაკავშირებით, განსაკუთრებული მნიშვნელობა შეიძინა და ვირუსთან საყოველთაო ბრძოლის პირობებში, ერთ-ერთი უმთავრესი პრიორიტეტი გახდა.

ჯანმრთელობისა და სოციალური დაცვის პროგრამები ითვალისწინებს სოციალური რისკების პრევენციასა და კრიზისზე დროულ რეაგირებას;

მუნიციპალიტეტის ტერიტორიაზე რეგისტრირებული მოსახლეობის გარკვეული შეღავათებითა და სოციალური დახმარებით უზრუნველყოფას;

პროგრამების მიზანია მუნიციპალიტეტის მოსახლეობის სოციალური მდგომარეობის გაუმჯობესება.

სენაკის მუნიციპალიტეტის 2021 წლის ბიუჯეტით, ჯანმრთელობისა და სოციალური დაცვის პროგრამებზე 1 181 000 ლარი გამოიყო.

მიმდინარე წელს, მუნიციპალიტეტის მოსახლეობა 16 მუნიციპალური პროგრამით ისარგებლებს:

საზოგადოებრივი ჯანდაცვის მომსახურების პროგრამა, რომელსაც, დელეგირებული უფლებამოსილების ფარგლებში, ა(ა)იპი სენაკის მუნიციპალიტეტის საზოგადოებრივი მომსახურების ცენტრი ახორციელებს;

ჯანმრთელობაგაუარესებულ მოქალაქეთა სტაციონალური, ამბულატორიული და მედიკამენტოზური მკურნალობის დაფინანსებისა და თანადაფინანსების პროგრამა, რომელიც მოიცავს სტაციონარულ და ჰოსპიტალურ მომსახურებას, სამედიცინო კვლევებს; ასევე, სამკურნალო-სარეაბილიტაციო მომსახურებას - შეზღუდული შესაძლებლობის მქონე პირთათვის ; ქიმიო, იმუნო, სხივური და რადიაციული თერაპიის კურსის დაფინანსებას; მაღალტექნოლოგიურ, ინსტრუმენტულ კვლევებს ონკოლოგიური დაავადების მქონე პაციენტებისთვის;

მედიკამენტოზური მკურნალობის დაფინანსებისა და თანადაფინანსების პროგრამა;

მედიკამენტების დაფინანსება ხორციელდება ონკოლოგიურ პაციენტებზე, სოციალურად დაუცველ და შშმ პირებზე;

მზრუნველობამოკლებულთა კვებით უზრუნველყოფის პროგრამა - ქვეპროგრამის განმახორციელებელი - ა(ა)იპი ,,სენაკის მოსახლეობის ამბულატორიული მომსახურებისა და მზრუნველობამოკლებულთა კვების ცენტრი”;

მრავალშვილიან ოჯახებზე დახმარების პროგრამა;

ბავშვზე ზრუნვის პროგრამა, რომელიც მოიცავს დედ-მამით ობოლი და იშვიათი დაავადების მქონე ბავშვების დახმარებას, ასევე, სოციალურად დაუცველ 1 წლამდე ბავშვთა ხელოვნური კვების პროდუქტებით უზრუნველყოფას;

სარიტუალო მომსახურების პროგრამა;

ხანძრის შედეგად დაზარალებული მოქალაქეების დახმარების პროგრამა;

სოციალური ადაპტაციისათვის სამზრუნველო ქსელის და ძალადობის მსხვერპლთა დაცვის ღონისძიებების გატარების პროგრამა;

შეზღუდული შესაძლებლობების მქონე პირთა დახმარების პროგრამა;

სოციალური ღონისძიების პროგრამა, რომელიც ითვალისწინებს 100 წელს გადაცილებული მოქალაქეების, სამამულო ომის ვეტერანების, ჩერნობილის ატომური ელექტროსადგურის ლიკვიდაციაში მონაწილეების, ISAF - ის მისიაში და აგვისტოს ომის დროს, ომში დაღუპული მეომრებისა და მშვიდობიანი მოქალაქეების ოჯახებისთვის დახმარების გაწევას;

თირკმლის ჩანაცვლებით თერაპიაზე მყოფი მოქალაქეების დახმარების პროგრამა, რომელიც მოიცავს დიალიზის ცენტრამდე, მოქალაქეთა ტრანსპორტირების უზრუნველყოფას;

შშმ ბავშვთა დღის ცენტრ ,,ლაზარე - 2015-ის“ თანადაფინანსება;

პროექტის - ,,საქმიანობათა ცენტრი სენაკში უსაფრთხო გარემოსა და სიცოცხლის ხელშეწყობისათვის” თანადაფინანსება;

პროექტი „ვიზრუნოთ უფროს თაობაზე“, რომელიც ითვალისწინებს 20 ხანდაზმულის შინმოვლის სერვისით უზრუნველყოფას.

სენაკის მუნიციპალიტეტის 2020 წლის ბიუჯეტით, ჯანმრთელობისა და სოციალური დაცვის უზრუნველყოფის ჯანმრთელობისა და სოციალური დაცვის პროგრამებით 10 488-მა ბენეფიციარმა ისარგებლა.