განათლების საერთაშორისო ცენტრმა, პარტნიორ საერთაშორისო ორგანიზაციებთან ერთად, 2021-2022 სასწავლო წლისათვის ექვსი სასტიპენდიო პროგრამა გამოაცხადა

• 2021-02-06 16:16:44

განათლების საერთაშორისო ცენტრმა, პარტნიორ საერთაშორისო ორგანიზაციებთან ერთად, 2021-2022 სასწავლო წლისათვის ექვსი სასტიპენდიო პროგრამა გამოაცხადა.

პროგრამები ითვალისწინებს როგორც სწავლის საფასურის, ისე ცხოვრებისთვის საჭირო ხარჯების ანაზღაურებას.

ეს პროგრამებია:

საერთაშორისო სამაგისტრო პროგრამები;

საერთაშორისო სადოქტორო პროგრამები;

საერთაშორისო სახელოვნებო აკადემიური პროგრამები;

საზღვარგარეთ კვალიფიკაციის ამაღლების პროგრამა;

სამაგისტრო პროგრამები საფრანგეთში;

აკადემიური პროგრამები იტალიაში.

მიმდინარე წელს უკვე დასრულდა 1 პროგრამა (უნგრეთში გაცვლითი პროგრამები).

სასტიპენდიო პროგრამები არის კარგი შესაძლებლობა საქართველოს მოქალაქეებისთვის, რათა სწავლა გააგრძელონ და აკადემიური ხარისხი მოიპოვონ/აიმაღლონ მსოფლიოს სხვადასხვა ქვეყნის საუკეთესო უმაღლეს სასწავლებლებში.

ექვსივე პროგრამის ელექტრონული განაცხადების მიღება ცენტრის ვებგვერდზე - www.iec.gov.ge - 5 თებერვალს დაიწყო, საფრანგეთსა და იტალიაში სასტიპენდიო კონკურსის ფარგლებში განაცხადები 5 მარტის, ხოლო დანარჩენ პროგრამებზე 5 აპრილის ჩათვლით მიიღება.

პროგრამით დაინტერესებულ კონკურსანტებთან პერიოდულად დისტანციურად გაიმართება საინფორმაციო შეხვედრები. კონსულტაციის გავლა შესაძლებელია სოციალურ ქსელში ცენტრის ოფიციალურ გვერდზე

https://www.facebook.com/iec.gov.ge

ან ელფოსტის: info-iec@iec.gov.ge მეშვეობით.

განათლების საერთაშორისო ცენტრი ყოველწლიურად 12 პროგრამას ახორციელებს და დაახლოებით 200-მდე სტუდენტს აფინანსებს. მათ შორის 2020 წელს, პანდემიის მიუხედავად, დაფინანსდა 120 სტუდენტის საზღვარგარეთ სწავლება, ხოლო ბენეფიციართა საზღვარგარეთ სწავლისთვის სახელმწიფოს მიერ 4 მლნ ლარზე მეტი გამოიყო. ჯამში უკვე 1000-ზე მეტი სასწავლო სტიპენდია გაიცა.

საქართველოს მოქალაქეები განათლების საერთაშორისო ცენტრის დაფინანსებით სწავლობდნენ/სწავლობენ მსოფლიოს 40-ზე მეტი ქვეყნის წამყვან უმაღლეს სასწავლებლებში.